剛到埗嘅朋友可能喺搬屋嘅時候都未必第一時間諗起睇電視呢樣嘢，Eric哥哥都一樣，仲喺香港嘅時候，除咗間中睇下Viu，平時都少睇電視！整屋都有排整啦，得閒咪手機/電腦睇住Netflix先囉，真係電視都未買。直到有日收到封由TV Licensing發出嘅信，提我要交電視牌照費用先如夢初醒，係喎，英國嘅免費電視唔係真係免費。
無論係家用定商業用、買屋定租屋，通通都每年要俾錢，否則就觸犯法例，而當收到信都逾期唔交錢嘅話，執法人員有權去你嘅屋企調查你有冇違法收睇及錄影電視！
好彩電視牌照費用都唔貴，家用牌照由今年4月1日起都只係講緊£159一年，閣下亦可以選擇一次過繳交全年費用或者按月/季度去交。各位如果未整電視牌照嘅快啲去呢度網上申請返個牌照啦：https://www.tvlicensing.co.uk/
另外，即將會搬屋嘅朋友都記得要網上申請返轉移牌照去新嘅地址，否則又會當你違法收睇電視。其實去到出呢篇文呢一刻，Eric哥哥都係未買電視機嘅～因為仲係忙於裝修屋企（同埋煲Netflix），但電視牌照費用都係要乖乖照交，因為要證明自己冇睇電視其實係好困難，口同鼻拗，而且牌照嘅適用範圍係包括電腦、手機、喺YouTube收睇BBC live stream等。題外話，我覺得最誇張嘅係原來嚴重視障人士都要照交錢，不過收半價！
當諗到呢度嘅節目普遍都製作認真，又唔使喺香港睇大台「是是但但新聞」，俾錢都俾得gur好多啦係咪：）
