喺香港倒垃圾好簡單，每日都係將垃圾包好然後放喺樓層指定位置，就有工友辛勤咁幫我哋處理。嚟到英國，雖然都係市政府為我哋代勞，不過就係每星期先會收集一次，並且自己要記住今個星期係輪到收垃圾定回收，錯過咗收集日期就唔好意思啦，要再隔多一個星期先會收集返該種類。
善忘嘅話唔緊要，上市政府網站填返地址就可以睇返收集垃圾嘅schedule。
不過，Eric哥哥試過垃圾收集日當日返到屋企發現成個垃圾桶蓋唔見咗，相信都係市政府倒垃圾嘅時候跌咗個垃圾桶蓋入垃圾車無幫我哋執返⋯⋯咁點算好呢？好彩各個市政府嘅網站都有得網上填表搞掂垃圾桶損毀同遺失嘅問題嘅，甚至如果你間屋住戶人數較多，都可以視乎情況網上填表申請尺寸大啲嘅垃圾桶。
個個城市收費情況不盡相同，多數都會免費幫你維修，而要個新垃圾桶就要收錢，大約£20左右。通常表格會問你係成個垃圾桶唔見咗定係損毀、垃圾桶損毀嘅部份喺邊度，以及你希望市政府邊個日期過嚟幫你維修返個垃圾桶咁。
心諗就梗係最好ASAP啦唔該，但理想與現實，Eric哥哥喺網站入咗ticket之後，市政府係未有於指定日期過嚟維修嘅⋯⋯仲要嗰排係落緊雪，要臨時搵塊板遮住個垃圾桶，唔係一溶雪就會浸住累積咗一星期嘅垃圾，超級噁心！諗到當時lockdown緊，都好體諒可能出現人手不足嘅情況，所以都好好耐性咁等多一個星期先入過張新ticket，但最後發現都係無人嚟維修，後來總共入咗3次ticket等足1個半月先整返好。
希望大家都唔使經歷呢啲咁狼狽嘅情況啦！另外，不妨喺自己嘅垃圾桶及回收箱度做啲記認，超市都有專貼垃圾桶嘅數字貼紙賣，甚至你可以用噴油噴返間屋嘅門牌號碼，等市政府工作人員收集垃圾之後唔會推咗你個垃圾桶去鄰居嗰度。
