唔知各位每個月嘅水費支出大概幾多呢？據本地食水政策倡議機構Water UK估計，英國國民平均每月水費支出約£33.05,當然視乎地區食水供應商略有差別啦。今次Eric哥哥想同大家分享一單早排發生喺親友身上嘅巨額水費驚魂事件，小窮L Eric哥哥聽到真係被震懾了，事關自己平時每個月交嘅水費仲低過個平均數⋯⋯
早排親友屋企突然水箱漏水，咁當然盡快、即刻、立馬call合資格技工嚟屋企維修啦。然後過咗無幾耐到佢夠期繳交季度水費嘅時候，嗰期水費單 charge咗佢£1,375！嘩，港紙萬幾蚊好金吓喎，聽見都被震懾了⋯⋯係夠喺英國買2-3個月好豐富grocery嘅錢喎！
最後結局係點呢？親友同食水供應商聯絡講述情況，收到巨額水費單事隔約10日後，食水供應商幫佢跟進個案後出返封信俾佢，參考返之前佢家庭嘅用水量，waive返佢成£1,100有多，好彩係happy ending唔使找嗰筆冤枉數咋!
喺度同時要盛讚吓英國嘅友善文化，都係傾向相信人普遍係誠實，所以善意（in good faith）咁waive咗漏水嗰筆數。另外，客戶服務嘅效率亦算唔錯，都係10日鬆啲就跟進咗親友嘅個案，出封信派返粒定心丸俾佢。咁當然親友呢個happy ending都係因為佢家庭本身平時用水量唔多，佢自己亦積極有禮咁盡快聯絡食水供應商啦。
Eric哥哥想提吓大家，記得定期搵吓合資格技工檢查家中常用嘅設備，特別係水箱同暖爐（boiler）。亦記得定期報水電煤錶，或者考慮裝返個smart meter,等供應商可以準確掌握用量，咁就唔會收多咗錢自己都唔知啦。最後，最緊要係珍惜天然資源，唔好浪費食水啦：）
