各位嚟咗英國嘅朋友，最近有無因為覺得好凍而係咁長開heater呀？Eric哥哥提提你：小心電費煤氣費好貴呀！記得set定時間制或者thermostat等部heater每日適時自動開關，咁就慳到錢又唔會浪費能源啦～
今次同大家講下水電煤單無啦啦收貴咗應該點處理，一發現有呢個情況記得要盡快跟進呀。
話說Eric哥哥剛搬入新居時考慮到價格而決定轉用新嘅能源供應商，由於當時轉供應商期間有大約兩星期多啲嘅真空期，因此呢兩星期仍然係舊供應商提供服務，夠期自然要找數啦。一收到張電煤單打個突，起碼比我嘅實際用量估高咗5成幾！明明申請轉公司時已經有報定錶提供讀數，嚟到張單都係唔啱。咁點算呢？最後Eric哥哥都好好彩輕鬆解決到，直接打電話去customer service hotline講述情況，提供返唔同日子嘅咪錶讀數之後，對方就幫我取消張單，然後大約兩星期後我就收到調整返正確用量嘅電煤單啦。幸運地水費單暫時一切正常，因為Eric哥哥嘅屋企係屬於無裝水錶、每年劃一收費嘅例子，而無裝水錶呢個情況較常出現喺獨立屋。曾經有事要同食水供應商查詢，都係一個星期左右就成功解決。個人經驗係普遍喺英國呢邊嘅CS都態度非常有禮同埋相對有耐性，所以大家都唔使擔心。
以下3個小貼士俾大家，等大家避免經歷我嘅情況：
1. 定期影低咪錶讀數，有相為證
咁就有哂日期同用量嘅紀錄作保障，有咩事都方便同供應商跟進，唔使口同鼻拗。
2. 善用網上／手機app報錶功能
大部份水電煤供應商都有非常方便嘅網上/app報錶界面，定期報下錶，咁供應商對你嘅用量自然掌擁得更準確啦～
3. 考慮裝返個smart meter（適用於電及煤）
英國政府有意鼓勵大眾安裝smart meter,因此所有能源公司為你安裝smart meter都唔會向你額外收費。裝咗smart meter之後會有部電子顯示器，用量一目了然、又準確，又唔使自己報錶。部份能源公司更會提供更優惠嘅plan俾smart meter用戶，各位不妨主動向供應商查詢。
