以前睇外國劇集，成日覺得外國家庭買清潔劑多到好誇張。人在英國之後發現喺呢邊由於水土氣候唔同，有幾款清潔用品要常備家中，唔係真係玩死自己！
初到埗住BNB都有留意下當地人買咩牌子嘅清潔劑，以下介紹嘅清潔劑，有啲牌子試過真係特別好用（全部非廣告），有啲就咩牌子都無所謂，大家慢慢試下比較下：）
以下係按Eric哥哥清潔時嘅抓狂程度介紹：
1. Bathroom Cleaner
英國水質偏硬，浴室好易積水垢皂垢。你會發現浴室牆身、水龍頭同洗手盤講緊係快到幾日就會出現微微粉紅色嘅水垢，過多幾日都唔處理就越嚟越厚同好易發霉！呢個時候bathroom cleaner好幫到手，噴完之後等幾分鐘再用海綿輕輕刷下就沖得甩啲污跡，仲消埋毒。特別推介Mr. Muscle 系列，見幾間BNB屋主都係買佢，跟機無衰！效果真係特別明顯，洗完浴室回復閃令令。各位唔好懶，建議最少一星期清潔1-2次浴室。
2. Mould and Mildew Remover
由於英國一樣濕氣重、溫差大，窗邊及天花角落頭嘅位置容易凝結水點，好容易發霉（有啲霉唔係一點點咁簡單，係起毛毛狀⋯⋯）。噴下Mildew and Mould Remover喺發霉位置，等幾分鐘啲發霉跡就消失哂，再抹一抹就得，好治癒！特別推介Dettol Mould and Mildew Remover。呢邊天氣唔係時時都適合開窗，但盡量保持室內乾爽好重要，就算唔買抽濕機都要開多啲抽氣扇幫助空氣流通。
3. Drain Unblocker
雖然廚房同浴室去水位有放隔器防止頭髮同雜物跌落去水口，由於水質硬嘅關係，每隔幾個月就會覺得去水慢咗好多，記得買定drain unblocker睇門口，定期大清潔一次。特別推介Mr. Muscle Drain Gel，倒落去水位等幾分鐘之後再倒啲熱水落去水位就完成清潔。
4. Multi-purpose Kitchen Cleaner/ Multi-purpose Surface Cleaner
廚房、餐枱、經常摸嚟摸去嘅地方如雪櫃門同櫃桶手抽等都好需要日日基本清潔同消毒保持衛生。呢類產品就咩牌子都無所謂，平平地買超市自家品牌都效果唔錯，最緊要係咁噴都唔心痛。建議睇label揀啲寫明有埋消毒功效、適用於廚房worktop唔使過水都得嘅產品，始終清潔預備食物嘅地方都係揀得小心啲好。
5. 檸檬
你無睇錯，真係介紹大家得閒買包檸檬睇門口，反正又平又有益！得閒開邊切個檸檬榨汁沖水飲/煮餸，剩低個檸檬皮用嚟放入電熱水煲，煲一次水去水垢，或者用檸檬皮摔下廚房洗手盤及水龍頭溫和去水垢效果一流！
希望以上介紹幫到大家清潔家居嘅工作輕鬆啲，各位有無其他心水推介呢？同我哋分享下呀～
