各位打算買屋或租屋嘅朋友，一定唔會對Rightmove陌生。基本上就算地產公司自己另設網站/APP都好，通常都會同步將樓盤資料放埋上Rightmove度，始終Rightmove嘅用戶瀏覽量真係高。當然，如果喺就近地產公司見到心儀嘅樓盤就簡單好多啦，直接行入去同agent查詢就搞掂，但今次主要想分享經地產網站/APP預約睇樓嘅流程大概係點、禮儀方面有咩要留意、以及其他注意事項：
留意樓盤上面列出嘅聯絡方法
睇得多listing就會發現好得意，有啲agent只限email查詢，有啲又只限電話查詢，甚至有啲會引導返你去佢地產公司自己網站/裝佢個APP先可以獲得更多該樓盤資訊。
無論經邊個途徑查詢都好，除咗基本禮貌打聲招呼，最緊要都係查詢時提及返樓盤嘅reference number（通常喺樓盤listing底下會列出）,方便對方跟進。同理，如果打電話無人接聽，電話留言都係提供返reference number以及自己聯絡方法，通常agent都好樂意聯絡返你嘅。另外，記得唔好辦公時間以外電話chur對方，如果留咗言隔1-2個工作日都未有人回覆，先再致電查詢啦，呢邊唔同香港嗰種24/7扭曲工作文化，要尊重返人哋休息時間。
靜候賣家/Agent確認睇樓日期及時間
假設初步聯絡後一切順利，緊接就係確認睇樓日期及時間。切記一定要靜候對方確認咗先，唔好chur到睇listing知道樓盤地址就自己擅自前往，咁會嚇親人而且非常無禮貌！
睇樓敬請準時
無論睇樓係由agent抑或屋主親自接待，各位敬請準時，因為對方有機會全日連續接 待幾位預約睇樓，以免影響下一個timeslot。最好預鬆時間、查定交通前往方法，較預約時間提前10分鐘左右到達就最理想啦。
睇樓保持禮貌及適量交流，留下好印象
到達睇樓地址後，請先按門鐘靜候agent/屋主出嚟，亦有啲情況可能agent會約埋你喺門口等埋先一齊入去搵屋主。如果屋主親自接待，打招呼後問聲對方需唔需要除鞋，對方會好多謝你，因為普遍啲屋都係鋪地氈，你除鞋入去佢唔使事後清潔得咁辛苦，佢會對你印象好好！當然，有啲情況就只係agent帶你睇樓，咁rule of thumb就係agent除鞋入屋你就照除，佢唔除鞋照行入去你就唔使除鞋。另外，睇樓時有咩疑問 都不妨開心見誠問下交流下，最緊要就係如果想影相記錄低作參考用，記得要先問准人哋。有時啲屋主親自接待都好nice,唔趕時間嘅話仲會沖杯茶俾你飲下、坐低食件茶 餅傾幾句偈tim。通常都係閒話家常，或者簡單了解下你嘅背景，當然你都可以把握機會借機隱晦咁打探下對方點解放租/賣屋、附近鄰居背景同性格大概係點等等（同 埋睇下有冇伏位啦）。價錢就最好唔好當面討論啦，亦唔好當面講價，咁做非常無禮貌。
睇樓後同agent保持聯絡
有啲賣家可能好nice會留埋自己電話歡迎你隨時聯絡，但如果對方無咁做都好正常，因為睇樓後主要都係各自同返個agent聯絡跟進。有部份地產網站/app甚至喺你睇樓後，可以經佢網站/app出價或者確認有意成交。當然，唔係次次睇樓都一拍即合，如果睇完之後覺得唔啱心水，而agent打電話俾你/email同你跟進，都唔好已讀不回人哋。直接禮貌地同人講聲唔適合，或者清楚講明需要考慮多幾日，對方都會好多謝你減省佢嘅工作量唔使無止境地等，將心比己啦呢啲嘢。
結語
講到呢度，大致上無論買屋定租屋都好，agent之後都會再同你講解成交之後下一步要預備啲咩。
如果買屋嘅話，喺呢個時候都可以自己搵/問定親友介紹個相熟律師俾你。往後就係靠雙方律師跟進同埋預備成交嘅文件。有啲agent都會有相熟律師，但個人經驗係有 部份agent以及佢哋用開嘅律師較少處理non-locals買樓嘅情況，唔係好識（或者嫌麻煩唔想接），所以自己搵定律師多一手準備穩陣啲。另外，趁機提多句：買屋嘅話， 程序上agent係唔應該向你收取佣金，只會喺正式成交後向賣方收佣。
最後，Eric哥哥喺度祝大家睇屋搵屋一切順利，盡快settle好開始新生活：）
