某日下晝返到屋企，Eric哥哥就發現一份由市政（council）派發嘅通告單張，寫住「micro-asphalt surface treatment」,即刻就意識到進出屋企嗰條馬路將會進行維修工程啦！除咗講吓個過程係點之外，都想提大家少少注意事項，將來如果喺各位屋企附近council需要維修馬路嘅時候，可以準備得好啲。
工程進行時間
通常於每年嘅2月至11月進行，喺住戶收到單張之後嘅3個工作天內開始工程，除咗收到通告之外，你都會喺附近嘅公共設施當眼位置（如街燈、大樹、欄杆等）見到綁住幾個膠牌告示，提大家預計工程完成日期。
星期一至日都有機會，時間由上晝7點至下晝6點。視乎工程嘅規模同埋天氣影響，有時都需要分開幾日先完成到。
馬路維修過程
由於工程其中一日喺星期六進行，所以宅在家中嘅Eric哥哥都有八卦下望咗一陣。簡單講就係倒啲瀝青鋪返靚仔條馬路啦，不過由於依家比較興用水瀝青，所以就相對無以前舊式油質瀝青咁大味。過程中都有重型工程車會駛入嚟條街倒瀝青，然後隔一陣就會見到一班「職安真漢子」好有默契咁拎工具人手掃靚個表面，呢個過程會重覆幾次直到個馬路表面固定好靚仔哂。完成工程後隔1至2日就會有市政府工作人員再返嚟檢視下。
工程期間注意事項
1．關好門窗及避免晾衫出屋外
雖然水瀝青比舊式瀝青無咁大味，但工程期間難免都係聞到啲唔太清新嘅氣味，對氣味比較敏感嘅朋友都係關好門窗唔好晾衫出去好啲。
2．泊好私家車
由於工程期間係唔准住戶嘅車輛出入及唔俾泊街，記得預先泊好自己架車，視乎情況收返架車入自己車房，或者當日非揸車不可嘅話就要預早泊定去屋企附近嘅合法泊車位置。
3．更改送貨/派件日期
如果網上買咗嘢或者訂咗groceries之後安排咗送貨日期喺工程期間，可以嘅話記得改期送貨呀，因為工程進行中車輛唔俾駛入嚟，送遞員拎住你盒重嘢揸唔到車入嚟真係企喺度⋯⋯
4．睇實小朋友同寵物
工程期間有大型車輛及重型機器運作，記得睇實小朋友同貓仔狗仔唔好俾佢哋獨自出去，免生意外。
5．等路面乾哂先好行出去/揸車
倒完瀝青之後其實大概30分鐘左右就會初步固定，不過天氣溫暖嘅話啲瀝青係硬得比較慢，出入施工位置要留意鞋底有無黏到瀝青，唔係踩咗啲瀝青入屋就GG⋯⋯
另外，亦見到有出面街外嘅車唔理告示，喺工程人員take lunch break嗰陣照駛入嚟，搞到有車軚痕，睇住班職安真漢子食完lunch返嚟見到啲車痕之後表情都講哂粗口咁，覺得超慘，好彩佢哋都非常敬業樂業，再鋪過再掃過整靚仔哂先收工，仲執拾好哂附近位置，好抵讚好專業！
完成工程後，有機會嘅話不妨同班職安真漢子打聲招呼讚下佢哋多謝佢哋，等佢哋知道有人欣賞佢哋嘅工作！
