各位有爬過文追開post嘅都應該知道喺呢邊無論打工定自僱都好，都係需要申請NI Number（National Insurance Number）嘅！雖然理論上喺只要證明到自己可以合法工作嘅情況下，未整好NI都可以開始搵工返工，NI後補，但現實係有啲顧主都係會要求先提供NI，又係「雞先定蛋先」嘅問題啦唉！
好彩嘅係，英國政府近月終於稍為簡化咗申請NI程序！之前係要打一個十世都唔通嘅申請熱線索取表格，等對方寄份表格嚟，然後填妥表格及寄回身份證明文件。依家終於唔使浪費時間打呢個永世都唔通嘅電話啦！申請NI新程序如下：
- 瀏灠https://www.apply-national-insurance-number.service.gov.uk/apply/welcome
source: gov.uk - 按網站要求填寫求職狀態，個人資料及聯絡方法等，之後就會見到網站頁面提供一個你獨有嘅申請參考編號，以及可供下載嘅NI申請表格。
- 同時你都會即刻收到電郵，電郵內容會提及你嘅申請參考編號、下載NI申請表格嘅link、所須提交嘅身份證明文件（如護照有相及簽名嗰版嘅黑白影印本）。
- 請按指示列印份表格、並以黑色筆及正階大階填妥資料，連同證明文件寄回指定地址。記得對一對表格第一頁系統自動幫你填好嘅申請參考編號同電郵入面提供嘅申請參考編號係唔係相同。
- 官方暫時寫明需時約16個星期處理申請。之前喺疫情之下，政府就取消咗申請者要去Jobcentreplus進行簡單面試嘅要求嘅，但隨住lockdown逐漸放寬，依家可能會要求返申請者去面試都未定，所以各位都要留意返有個心理準備呀。
Eric哥哥祝各位快快順利整好NI，成功搵到心儀嘅工作呀！
