對唔少移英家長嚟講，除咗搵地方住之外，相信最趕住要做就係幫自己仔女搵學校。
有唔少同路人搵我幫手搵學校，都累積左好多唔同家長係搵學校方面嘅睇法。有幾個盲點我相信大家都一定要留意，以免最後搞到自己唔開心，或者影響到小朋友。
不要期望過高
呢個可能都係香港家長嘅其中一個典型心態，就係追求名校。平心而論，一間過往成績好嘅學校當然我哋對佢嘅教學質素會有信心，但係究竟所謂名校要有幾”名”，我覺得都一定要睇住自己小朋友嘅能力而量力而為。
講真，你估真係個個小朋友都適合讀喇沙、女拔、聖保羅男女校咩？
去到英國，我哋啲小朋友母語又唔係英文，究竟何德何能覺得會跟得上英國嗰邊最top嗰批學校。
所以如果去到英國搵學校嘅話，只要間學校係中間或者中上，基本上已經讀得過。Grammer School呢啲揀學生嘅學校，佢揀到你即係代表你都叫有能力，揀唔到你其實就真係算罷，無謂勉強，俾你操一輪11+入到而又讀得鬼咁辛苦，個細路都唔會好過。
切勿心存僥倖
如果係報State School嘅話，喺而家一大堆香港人湧過去嘅時候，大家真係唔好諗住一去到就可以搵到一間心儀嘅學校。
大家有入去各個香港人group嘅話，就知道好多區其實有間學校俾你讀已經好偷笑。
所以大家搵學校，一定要預咗自己係排waiting list，要諗清楚自己間屋究竟要租邊度，先最幫到自己小朋友入到想入嘅學校。
即使俾你有好好嘅策略去報學校，都仲有起碼50%係要靠下運氣，睇吓係咪真係有你小朋友嗰個year嘅學生退學，先有位俾你入。
所以如果有啲幫人搵學校嘅agent，講到包生仔咁款，就真係要小心。
避免港人聚居
我相信大家都開始感覺到有好多區已經住滿晒香港人，令大家都開始留意到太多香港人捩埋一堆嘅問題。
不過我想講嘅唔係爭屋同爭學位嘅問題，而係事實上如果小朋友喺生活上都經常接觸香港人嘅話，對佢哋融入英國呢度嘅學習同埋文化，真係一啲好處都冇。
呢方面大人都一樣，識多啲英國當地嘅其他家長，都真係快啲幫大家知道喺英國好多同小朋友有關嘅窿路。
總之家長們加油之餘，就隨遇而安啦。
大家都係信任英國呢邊嘅教育同社會環境，先之過嚟㗎嘛，係咪？
