暑價過後，又係細路返回校園生活嘅日子，加上不少家庭喺呢個暑假先至嚟到英國，應該不少小朋友要面對適應英國校園生活嘅問題。
當然，英國同香港嘅學校課程有唔少嘅分別。相信唔少仔女已經入學嘅家長都留意到，英國學校喺學習上邊比小朋友嘅壓力其實已經比香港少咗好多，功課少參考亦都少，所以困難應該未必係學業成績、學習要求深淺方面。相反，小朋友喺溝通同埋社交能力上面先係真正嘅適應問題。因為英國嘅課室學習，好多時候都着重喺課堂上面去表達，喺一班同學面前講嘢分享意見。對於一啲比較內向嘅小朋友，真係分分鐘全堂好似隱咗形咁。如果小朋友本身都有少少社交焦慮，真係分分鐘搞到學都唔想返。
咁講返一開始嘅題目，又點解越大個越難適應呢？
正如上面所講，溝通對適應來講係非常之重要。而其實小朋友年紀越大，尤其是已經去到中學階段，香港小朋友同英國小朋友喺語言能力上邊嘅差距會顯得越來越大。喺課堂上面，越高年班越講求表達嘅層次同埋速度。如果香港嘅小朋友本身英文唔算特別叻，真係好難喺課堂上面表達到自己所諗到嘅嘢。就算你以往喺香港成績點好都好，呢度都分分鐘因為語言嘅問題變咗班入邊嘅”呆子”。
另一個青少年遇到嘅問題，就係社交上面嘅困難。”小學雞”都還好啲，大家無聊聊亂噏一餐都做到friend。中學生大家開始講形象，更加強調埋堆。即使人哋唔睇你嘅皮膚顏色，見你都完全傾唔埋冷、答唔到嗲，真係唔蝦你都已經好好彩。
咁家長有啲咩可以做呢？
最直接，真係盡快幫小朋友提升佢哋嘅英語尤其是口語嘅能力。呢啲有時都唔係學校老師肯幫你補下英文就搞得掂。因為喺社交溝通上面，細路仔好多時用嘅口語都未必係一啲好正規嘅英語，再加上好多細路之間好興啲無無聊聊嘅英語笑話。呢啲真係要請教下啲local或者係英國讀過好多年書嘅香港人先至教得到。
第二樣就係要盡快了解呢度年青人嘅興趣同文化。男仔還好啲，因為打機之類嘅興趣都已經係大概一半男仔嘅common interest，加上打機本身就係跨地域文化。女仔冇咁鍾意打機，就要了解多啲呢度嘅女仔例如服裝、偶像之類有啲咩係呢刻嘅潮流。如果家長自己都唔識，都真係要一齊去做吓research。
最後就係，改變都唔係一時三刻就做到，英文都唔係兩三星期就會講到嘞嘞聲。家長都真係可以教下小朋友遇着啲自己表達得唔好甚至俾人笑嘅情況，有啲咩說話佢哋可以講嚟幫自己打圓場去應付尷尬場，呢啲都可以暫時解燃眉之急。
