作為一個居英多年人士，每次我同本地朋友聚會時都會被問及：究竟香港人啲創業精神去晒邊度？茶餐廳固然係一個商機（我咁多年只係知到一間有質素嘅，係喺York度），街邊小食亦都不容忽視，希望燒賣關注小組有啲成員會留意英國呢個市場，因為我仲未搵到魚肉燒賣食……
其實好多過左來嘅香港人都係IT人（我就有追＜＜IT狗＞＞），不論倫敦同曼徹斯特都好支持IT start-up。而即使疫情降臨前，英國早已行緊cashless，所以Fintech人才亦大受歡迎；近期火熱嘅Crypto同埋NFT專才亦都可以把握機會大展拳腳。
如果你有意搞間教育機構，除中文或音樂班外，不妨諗下一啲冷門科目，可能會把握到意想不到嘅商機。因為英國教育著重多元，學校所教嘅科目亦較多元化，比如有學校會教啲細路coding，有啲甚至會教非主流嘅專門知識，如藝術史、陶瓷等。而香港同英國喺教育方針同制度嘅差異，的確會令來自香港嘅學生同家長感到困擾，好似地理、宗教呢啲科目，喺香港根本不被重視，香港嘅小朋友過到來讀書，自然要啲時間適應同追翻進度。如果你有相關科目嘅知識，搞呢啲冷門科目嘅補習班都可能係一個商機。
講到學嘢，我成日都想喺文章度講多少少關於英國嘅知識，令到大家知多一點，日後考Life in UK時唔洗咁吃力。今次我就想講一首兒歌，關於亨利八世嘅。喺中世紀，國王結婚通常都係政治婚姻，冇嘢愛情成份，而亨利最出名嘅，就係娶左六個老婆，同埋令英國教會同羅馬教廷脫鈎。至於個六個老婆呢，最令人印象深刻嘅係佢地嘅結局：” ! ‘Divorced, Beheaded, Died, Divorced, Beheaded, Survived’” ，其實都幾慘，咁樣被人記住，仲要成日被人唱，想聽嘅就可以去youtube聽下。
https://www.youtube.com/watch?v=rTdTDCRKvvM
不妨問下你地啲小朋友有冇聽過呢首歌，考下佢地歷史啦！知多一點點，對你考Life in UK時會有幫助。
