大家有冇發現英國呢邊好多郵局分行，好似7仔咁「總有一間喺左近」呢？嚟咗英國之後，真係多咗機會使用郵局服務。Eric哥哥今年去郵局嘅次數夾埋真係多過前幾年喺香港嘅總和，始終唔係所有證件都可以完全喺網上搞掂哂申請，埋門一腳都係要玩郵寄，就咁平郵無tracking又唔放心！今次分享吓郵局除咗郵件寄送以外所提供嘅服務，可能幫到大家應急同慳返啲時間都未定，幫緊你幫緊你～
1．基本銀行服務
揸好遠車先去到銀行分行？銀行就嚟關門dog rush去都趕唔切入支票？附近無ATM機？就近嘅郵局幫到你！原來郵局分行可以提供主流英國銀行嘅基本銀行服務，如入現金、提取現金、入支票等。每間銀行同郵局合作提供嘅個人理財及商業理財服務不盡相同，大家可以去呢個網站參考吓自己用嘅銀行有冇同郵局合作：https://www.postoffice.co.uk/everydaybanking
2．辦理証件及索取表格
部份常用嘅申請表格都可以喺郵局索取同辦理，如申請車牌嘅D1 form、拎國際牌（International Driving Permit）去旅行揸車、繳交汽車稅及申請/更新護照嘅表格等，部份郵局亦提供付費代辦申請護照嘅服務，啱哂唔熟電腦操作嘅長者使用。另外，繳交車牌申請費用時需要用到嘅郵政匯票（postal order）都係經郵局辦理嘅。
3．核實身份及文件副本
無論搵工定係租屋買屋，經常需要提交身份證明文件副本（護照/車牌）或者地址證明（水電煤單/銀行statement）嘅副本，有時就咁提交電子副本就OK，但有啲較嚴格嘅公司可能要求經第三方核實嘅副本，如果嫌搵律師辦理好麻煩或者覺得未需要出動到搵律師，郵局嘅核實身份及文件副本服務（Document Certification Service）就幫到你啦。只需預先填妥及列印呢張表格：https://www.postoffice.co.uk/dam/jcr:0303073f-e16f-403a-8b61-7f117d1c21f2/document-certification-service-application-form-march-19.pdf
，再帶埋相關正本去俾郵局職員核對就搞掂，費用由£12.75起跳。
4．繳交水電煤費用及市政稅
暫時未辦理好英國銀行戶口而又需要交水電煤/市政稅，或者年長朋友唔熟悉網上繳費嘅話，拎住張水電煤單/市政稅單，可以去郵局到以現金繳費。瀏灠以下網址，睇睇你嘅服務供應商有冇同郵局合作：https://www.postoffice.co.uk/bill-payments
5．兌換外幣及辦理旅行保險
郵局有提供買賣外幣服務、辦理預繳外幣旅行卡，亦有簡單嘅旅行保險可以購買。當然匯率未必靚，唔係郵局邊有肉食，如果時間充裕嘅話Eric哥哥強烈建議大家四圍比較吓啲匯率先，例如睇吓早前Eric哥哥介紹過嘅NM Money，或者之前有UK Lazy Bag網友介紹嘅John Lewis以及各大超市嘅travel money kiosk等等。
