各位揸BN（O）嚟英國嘅朋友，喺慢慢打點好安頓好生活之後，記得盡返公民責任，快啲登記做選民啦！登記做選民除咗係公民責任，更加係保障香港人嘅聲音得以反映到，將來喺政策甚至公共資源方面嘅分配自然會更考慮到香港人嘅需求。另外，都唔少市政府嘅網站有寫明登記做選民係對喺英國建立個人credit score有幫助嘅！
今次Eric哥哥想提大家少少登記流程以及注意事項：
登記資格
只要你係BN（O）持有人並年滿18歲，你就符合居英嘅英聯邦公民資格，可以享有完整的投票權。 留意返，如果家屬係持特區護照咁跟隨BN（O）持有人嚟英國憑簽證居留，就要等到正式入籍成為英國公民先符合登記資格啦。
登記流程及所須資料
登記過程需時約5分鐘，並且可以網上辦妥。只需上https://www.gov.uk/register-to-vote，然後根據網站要求填寫居住地區、國籍、出生日期、其他個人資料及聯絡方法等。
過程中會問及你嘅National Insurance Number （NI）,如果未辦理NI都可以繼續登記程序嘅，惟需簡單填寫未有NI嘅原因，以及隨後補上其他證明文件。Eric哥哥登記做選民嗰陣都未辦妥NI，個人經驗係，地區市政嘅Electoral Services Officer會以電郵及信件聯絡，只需按指示提供返證明文件副本後，大約一星期左右就收到信件確認成功登記為選民啦。當係俾各位參考下，每個城市嘅Electoral Registration Office做法可能有些微出入都唔定。
另外，網上登記過程會問及你會否”opt-out of Open Register“。Open Register係一個公開嘅選民資料登記冊,如果你唔opt-out,入面會顯示你嘅全名以及地址，而任何市民或者商業機構都可以俾錢市政府去買一份副本。有部份人會選擇唔opt-out,原因係商業機構如銀行、保險公司或慈善機構等有可能會俾錢買份Open Register,以確認客戶嘅資料屬實。Opt-out與否各位自行考量啦，好重視私隱嘅Eric哥哥就選擇咗opt-out嘅。
最後，大家唔介意睇英文嘅當然歡迎參考返選民登記官方網站啦：
Register to vote
https://www.gov.uk/register-to-vote
The electoral register and the ‘open register’
https://www.gov.uk/electoral-register/opt-out-of-the-open-register
