近年時局動蕩嘅形勢之下，Eric哥哥就信奉「要保障資產一定唔可以全揸港紙」嘅，所以嚟英國嘅時候都有帶住話多唔多、話少唔少嘅幾款外幣現金。我估有部份朋友情況都可能一樣，嚟到英國之後需要慢慢再整理下/動用呢筆外幣現金。
英國唔似得喺香港咁隨時可以行去銀行就兌換外幣現金，呢度好多銀行分行係唔收外幣現金，就算開咗外幣戶口都係咁話，而即日親身去找換店又要食海鮮價。以下同大家分享下唔使親身去找換店都可以睇啱價錢先兌換外幣嘅途徑：
1. 使用NM Money郵寄兌換服務
NM Money喺全國有超過190間分店，而且Trustpilot review都好好，所以我都用得好放心。NM Money有項郵寄兌換服務好方便，只要上https://www.nmmoney.co.uk/travel-money/sell-travel-money 睇啱外幣個價位，就可以落訂單鎖定個匯率10日，每次兌換最多等值£750嘅現金。
填妥資料同地址之後，NM Money會郵寄一個已預繳郵費同保險嘅信封俾你，只需將外幣入落信封並填妥附上嘅表格，指定時限10日內去郵局投寄就完成。NM Money通常第二個工作天嘅下晝就會收到你投寄嘅現金，並會以電郵向你確認收妥。然後等多一至兩個工作天左右就會直接將英磅匯入你所提供嘅銀行戶口。唯一要注意嘅係如果唔喺10日內完成投寄，NM Money就會以佢收到你投寄嘅外幣當日匯率為準去處理，咁就冇咗之前嘅鎖定匯率保證啦。
如果想兌換高於£750等值嘅外幣，就需要親身前往NM Money分行，不過一樣可以喺網上睇啱價位鎖定匯率先落訂單，再預約前往分行。
2. 使用Post Office兌換服務
Post Office唔使多講，分行比NM Money數量更多啦，總有一間喺左近。Post Office都有提供類似上面NM Money嘅郵寄服務，不過僅限於用英鎊買外幣。而如果想用外幣兌換英鎊，就需要前往分行拎錢，不過好處係一樣可以網上睇啱價位先前往就近嘅分行。
Post Office相關服務嘅網址：https://www.postoffice.co.uk/travel-money/currency-buy-back
其實大型超市如Tesco及ASDA等都會提供買賣外幣嘅服務，不過呢排仍然係維持有限度運作。大家不妨上網四圍比較下、睇啱匯率先選擇最適合嘅找換服務！
