就算唔係素食者，喺香港都有機會聽過吓Green Monday、Omni Pork及Beyond Burger等，特別係近年多咗餐廳研發新派素食菜式令素食普及咗。Eric哥哥雖然唔係素食者，但都會得閒食下素，有時更係好奇植物肉之類嘅產品係咪能夠做到幾可亂真，間中會買素食材料試吓煮，當然啲素食食材有時都係hit and miss，會有中伏嘅機會啦！
講起傳統英式食物如Fish and Chips，Sunday Roast，Bangers and Mash等，似乎都係肉食為主喎。咁究竟喺英國易唔易「找素」呢？如果你或家人有素食習慣，或者特別膳食需要，希望以下嘅小貼士幫到大家放心搵食。
找素容易選擇多
無論去餐廳抑或超市，要找素都好多選擇，可以輕鬆講句英國係一個素食/純素食者友善（vegetarian/vegan friendly）嘅國家！誇張到你去一間Fish and Chips嘅專門店，都會見到餐廳提供幾個素食菜式俾客人揀。之前住酒店點咗個Full English Breakfast，侍應都主動問有無特別膳食要求，需唔需要轉做素香腸咁，普遍嚟講感覺到英國對顧客嘅膳食要求照顧得幾細心周到。
餐牌通常會喺菜式隔離以圖示或文字標明係蛋奶素定係純素，有無包含果仁咁，食客可以放心點餐。如果有唔清楚嘅地方，例如唔知Soup of the Day有咩材料，禮貌問吓侍應，佢哋都好樂意解答。
行超市都會見到特設Plant-based、Meat-free Food及Free-from專櫃,稍後再講呢部份。
多元文化食物—留意純素不等於齋
由於英國有唔同民族嘅人士定居，超市備有各類素食及純素產品之餘，Halal（清真）及Kosher（猶太）食物都會搵到。純素食者連雪糕、零食及應節食品都輕易買到，而且無香港咁貴。
如果各位有家人/長輩係佛教徒需要持齋，就要較小心選購呢邊嘅純素食品俾佢哋啦，呢邊鹹嘅純素食物好多時有落五辛（蔥蒜之類）去調味。
Plant-based，Meat-free，Free-from？
素食者行超市，睇實Plant-based及Meat-free嘅專櫃就穩陣啦，通常個專櫃都會懶係Green咁、青BB加幾塊樹葉，好當眼就見到嘅，冰鮮及急凍食品一應俱全。唔單止各個超市自家品牌有推出植物肉，傳統生產肉食嘅大牌子如Birds Eye都想分一杯羹搶佔市場，推出全新素食系列。
英國常見嘅植物肉種類多數係模仿牛、雞、魚、香腸及肉丸嘅味道及質地，超市亦唔難買到密封包裝豆腐，以及備有純素（不含奶類）芝士，基本上都足以烹調各國菜式。如果要刁鑽到好似香港齋鋪啲素肉齋滷味咁就難搞啲，可能要去一轉亞洲超市先搵到。
另外，間中都會喺Free-from專櫃搵到少量素食食材，因為Free-from專櫃主要係照顧對麩質、奶類及果仁敏感人士嘅需要，較嚴格嘅純素食者會喺Free-from專櫃買到純素無麩質無蛋無奶嘅包點、意粉、醬料、零食及energy bar等。
食物標籤幫到你
買食物唔好估估下，唔拎上手睇標籤就有中伏機會。例如你諗住買盒橡皮糖過下口癮實係素食啦，點知入面嘅明膠及色素都有機會係取自動物來源。（真人真事，大頭蝦唔係食開全素嘅Eric哥哥差啲唔小心貪圖盒糖嘅外表買咗盒唔係素嘅糖送俾一位素食朋友lol）
英國嘅素食品標籤多數除咗會寫明suitable for vegetarian/vegan之外，有啲亦會加個太陽花標誌（編按：上面張圖呀～），代表得到英國Vegan Society認證。此外，法例亦要求食品生產者必須清楚標明14種致敏成份，呢啲成份必須以黑色粗體字標示，當中包括純素人士唔食嘅蛋及奶。呢一點除咗幫到純素食人士選擇食物之外，對麩質、果仁及海鮮敏感等有特別膳食需要嘅朋友都有所保障。
如家中有濕疹患者需要戒口戒得好清，蛋奶麩質通通唔掂得，但又有啲掛住蛋糕意粉零食，不妨去Free-from及純素專櫃睇吓啲產品標籤，慢慢揀下可能有驚喜，呢度連無麩質純素生日蛋糕都有呢！
善用Vegan Society網上資源
Vegan Society提供一個素食者友善嘅平台推廣素食文化，各大品牌經由Vegan Society認證嘅產品目錄可以喺呢個網址睇到：https://www.vegansociety.com/search/products/a
