我好鍾意食水果㗎，去到每個國家都必須要食（人嚟～播返首「榴槤乜乜乜remix版」XD）。唔使驚，Eric哥哥唔係光頭，亦唔會帶把生果刀喺身嘅～
喺英國行超市見到水果種類琳琅滿目，真係好爽，仲要新鮮又唔貴，有時啲水果品種多到喺香港都未見過。雖然唔容易買到我哋香港人另一個鄉下日本嘅水果，但以下呢個免費嘅網上資源相信可以幫大家揀到平靚正嘅當造水果，享受多啲食水果嘅樂趣同益處。當然盡量買英國本地水果更好啦，價廉物美，亦能夠支持本地農業。
某次好奇Google下一個本地嘅蘋果品種，想知道味道係點，就無意中發現呢位英國有心人Mr. Nick Ball整嘅免費水果指南，叫Good Fruit Guide! 大家不妨bookmark定個網址先：https://goodfruitguide.co.uk 。佢都有整埋手機app版，不過已經好耐無更新，封哂塵，可以佛系download咗先睇下佢幾時緣份到了就更新。
阿Nick本身係一位水果產業鏈嘅技術專家，對水果嘅品種同生產過程均有充份認識。個網站會每月更新（有時會慢咗幾日），根據阿Nick自己對水果味道嘅喜好，佢會介紹返該月份有咩本地同入口嘅水果品種比較當造、註明產地喺邊、以及喺邊啲超市會搵到佢嘅蹤影。分類仔細到會講哂蘋果、橙、提子、有核水果、瓜類等等各有咩正嘢，真正做到不時不食。
網站亦有目錄可以搜尋唔同水果嘅介紹，以蘋果為例，佢用蘋果顏色分咗5個子版，再詳細列出每款蘋果嘅味道、香氣同質地，真係好有心機。Eric哥哥參考下阿Nick嘅指南之後確實食到唔少美味又平嘅水果，亦避免咗食一啲根本唔當造而比較淡口或者過酸嘅品種。
題外話，有次買一款叫Golden Delicious嘅蘋果，一食落去覺得味道有日本王林蘋果嘅影子！再上網查下發現王林蘋果真係有溝呢款蘋果品種培育出嚟，覺得好有親切感，大家見到不妨揀包爽口嘅Golden Delicious試下。不過佢同王林一樣有買咗唔耐放，口感好易變粉嘅問題，記得趁新鮮食！
另外，呢排英國嘅車厘子大豐收呀，鍾意食車厘子嘅有口福啦，買定多啲嚟自製果醬同焗返個靚批都唔錯。
