移民英國，最擔心 Home Sick！而最容易出現 Home Sick，就係食物唔啱胃口，掛住香港味道嘅時候！
唔駛驚！原來依家喺一般普通嘅英國超級市場，已經有好多香港人見慣見熟嘅亞洲調味料，以下介紹 4款，一齊睇吓貴唔貴？
1/ 李錦記蠔油 Oyster Sauce
樽上一句「Product of Hong Kong」，最有親切感！香港人創辦嘅李錦記，早已進駐英國最主流的六大連鎖超級市場嘅貨架，你喺 Tesco、Sainsbury’s、Waitrose 等都能輕易搵到！
最經典嘅 510g 熊貓牌鮮味蠔油，售價約 2.2英鎊 / 樽。另外，李錦記生抽、老抽、辣椒油、蒸魚豉油、麻油、海鮮醬、照燒汁等，也一應俱全。
2/ 日本萬字醬油 Soy Sauce
鍾意日本口味？逾 300年歷史嘅萬字醬油，同樣在英國超級市場輕易搵到。細樽 150毫升壽司豉油售價 2英鎊、大樽 500g 售價 3.65英鎊。我任職廚師的英國寄宿學校也用萬字醬油製作日本壽司便當俾英國學生感受亞洲風情。
3/ 泰國魚露 Fish Sauce
炒菜加幾滴魚露，即時香氣撲鼻，別有一番鮮味！你可以好容易搵到，香港人熟悉的魷魚版 Squid Brand 魚露，大大樽 750毫升只售 1.6英鎊，產地泰國。也有英國著名的亞洲調味品牌 Blue Dragon 的魚露，150毫升，售價 1.5t英鎊。
4/ 泰式是拉差辣醬 Sriracha Sauce
吃蘿蔔糕、乾炒牛河和 Pad Thai 的靈魂，就係嗰碟辣椒醬。泰國進口嘅飛鵝牌是拉差辣醬，喺各大英國超級市場售價約 3鎊 / 樽，望到已經好有食大排檔嘅感覺！因為 Pad Thai 喺英國好受歡迎，食嘅時候，英國人都好鍾意配是拉差辣醬，所以飛鵝牌已經深入英國人嘅民心！
除咗以上四款，香港人成日用嘅調味料，例如紹興酒、孜然粉、味噌、泰式辣醬、綠咖喱等，都喺各大英國超級市場有得買。希望大家鍾意以上介紹，嚟到英國，都能安撫腸胃同味蕾嘅思鄉之情！
