各位有無留意到超市門口貼住Challenge 25/ Think 25嘅海報同標誌呢？開頭都會覺得好混亂，乜唔係夠18歲嘅成年人就可以喺英國買酒類咩，心諗關25歲咩事？今次為大家介紹吓Challenge 25嘅由來，同埋Eric哥哥及朋友嘅親身經驗。
飲酒嘅合法年齡
我哋先睇政府網站點講先：年滿18歲喺公眾場所飲酒買酒都係合法嘅；而如果你16-17歲，喺成年人陪同下，你係可以配住餐點食品嘅情況下飲酒，但要由成年人代你購買。網站亦特別指出向5歲以下兒童提供酒精飲品係違法（心諗，有無家長會咁癲俾酒咁細個嘅小朋友飲呀⋯⋯）。
咁點解會出現Challenge 25？
Challenge 25係2009年由酒品零售業界組織Retail of Alcohol Standards Group推出嘅計劃，原意係鼓勵年滿18歲但外觀目測後生過25歲嘅人士購買酒類嘅時候主動帶備可以證明自己年齡嘅身份證明文件，以減低未成年人士可以購買到酒品嘅機會，通常接受有相片嘅駕駛執照同護照。
各大超市同家品店嘅職員喺見你童顏而合理懷疑嘅情況之下就會請顧客出示證件，未能出示證件的話，有權拒絕售賣相關年齡限制嘅貨品予該為顧客。
Challenge 25實際應用情況又係點？Eric哥哥同朋友嘅親身經驗
超市同家品店似乎都為免被罰錢，傾向採取寧枉勿縱嘅做法，廣泛咁將Challenge 25涵蓋埋購買酒品以外嘅部份商品，例如裝修工具同鉸剪之類嘅利器、甚至餐具餐刀套裝、煙花同壓縮易燃噴霧油漆產品都試過要Eric哥哥出示證件，喺self -checkout till都一樣。如果大家上網睇英國啲學生討論區八卦吓，就會見到有啲學生都講嗰個Challenge 25執行起上嚟有時準則都幾飄忽吓，發生一啲唔知好嬲定好笑嘅情況，例如話張ID同佢本尊唔夠似樣所以唔俾入pub咁。
Eric哥哥初初到埗嗰陣，第一次被要求提供photo ID嘅時候都感覺有啲尷尬，因為只係買一樽手指公咁大嘅酒版size Bailey’s生日特別版諗住送俾朋友，而Eric哥哥其實都而立之年，嗰次喺完全無諗過會俾人check證件嘅情況下，咁啱得一張香港身份證喺身，好彩張證件有英文，所以店員都肯接受，睇完仲笑一笑話估唔到我咁大個：O） 所謂一不離二二不離三，自從買裝修工具同買餐酒煮餸俾人check得多，依家直接自動自覺拎定張車牌出嚟就算，可能係英國店員較少接觸亞洲人所以唔係好識分辨我哋嘅年紀，不過童顏都係happy problem嚟嘅，哈哈。Eric哥哥有位朋友就無咁好彩啦，有次真係咁啱咩證件都無喺身出去超市買工具，店員就話sorry啦，真係唔賣得俾你⋯⋯而我朋友係而立之年加幾年！故事教訓大家有心出去購物嘅時候，著衫hea著頹tee放棄人生都唔緊要，最緊要係帶定證件喺身呀～哈利！
網上購物又如何？
拿，網上購物就真係case by case啦，Eric哥哥試過喺英國孖人牌網站訂廚刀套裝，臨check out都要提供護照部份資料證明夠秤先俾check out過到系統（放心唔係phishing網站，個網堅嘅）；亦試過分別喺唔同網站訂工具同買煙花嘅時候，網站話職員送貨嘅時候有機會要求出示證件證明年齡，而職員送貨嚟嘅時候完全無理會到，咋咋臨送完貨就走人嘅。
