快要參加聖誕派對而還未買到禮物？希望我嘅英國禮品指南會幫到你啦！
我完全明白搵到一件既啱budget 又得體嘅禮物一啲都唔容易，若果禮物只係啱某種性別，咁又唔啱喺office嘅聖誕派對；另外喺有啲社區活動，禮物要適合唔同年紀嘅人，咁買禮物呢件事又如何入手呢？以下係我嘅小小建議：
1. 茶類和食品
英國人好鐘意飲茶嘅，去 Fortnum & Mason 買茶葉或者其他禮品包就肯定冇錯。佢tiffany blue嘅包裝點睇都係咁備受注目。而Whittard of Chelsea就係另一間著名茶葉品牌，有荼葉片、茶包同埋可可，一樣廣受英國朋友歡迎。如果你鐘意送甜食，義大利麵包 (Panettone) 或者 Yule Log cake 就夠晒聖誕氣氛。再簡單啲，去你就近嘅朱古力或者糕點店，都會搵到好味又得體嘅禮品包。
2. 家品裝飾
如果你朋友係以有品味見稱，咁香薰蠟燭 、香薰機以及靚靚廚具就啱晒佢地，若果你有幸去過佢地屋企，不妨花多少少心思，幫佢地襯埋顏色同風格啦！
3. 科技或健康產品
冬天流流長，成日都匿喺室內，呢個時侯大家都會想要又型又潮嘅音響器材、實用嘅攪拌機、榨汁機，以及健身用品或者智能運動手錶啦，咁樣足不出戶都有大把嘢做，又有健康生活。
送禮，留低嘅都係一份心意，而唔想增加人地負擔。若果同親朋密友交換禮物，記緊先取得共識，預定好budget，甚至寫低願望清單，咁樣大家都會開開心心渡過一個快樂聖誕啦！
