各位有香港車牌嘅朋友，知道到埗後幾時可以申請英國車牌嗎？今次Eric哥哥想提下大家一啲關鍵日子同埋申請英國車牌嘅流程及注意事項。
1．合法駕駛期達12個月
由於英國認受香港車牌互換嘅制度，所以香港車牌持有人可以喺英國合法駕駛長達12個月，到埗之後唔使擔心急於換車牌。當然啦，如果你好心急想盡快換牌，其實喺英國住夠185日就可以辦理換車牌手續嘅。早啲轉到英國車牌的話，申請汽車保險嘅保費係平啲嘅，呢一點都值得考慮下。Eric哥哥同保險公司update返有英國車牌之後，對方有安排退返部份保費差價去銀行戶口！
屆滿12個月之後，必須辦理更換英國車牌嘅手續先可以繼續合法駕駛，各位記得set定reminders提自己啦。
2．索取D1表格
首先可到https://www.gov.uk/dvlaforms 填妥資料索取一份D1表格，如果就近有郵局嘅話，亦可以親身向郵局職員索取D1 表格。
3．注意事項
跟住D1表格要求填妥個人資料及健康狀況之外，記得將證件相貼上表格、並連同香港車牌正本及£43支票（或£43 postal order）郵寄返去DVLA，表格內有列明DVLA地址嘅。如果你選擇以BNO護照申請是次轉換車牌，就唔需要將護照正本一齊郵寄去DVLA作核對，否則請跟據D1表格嘅要求郵寄身分證明文件正本俾DVLA。建議各位穩陣起見都係揀返有tracking嘅郵寄服務寄去DVLA，費事整唔見咗啲文件同埋張香港車牌，要補領都煩⋯⋯
個人經驗而言，大概比佢官方所講需時3星期快啲嘅，兩個星期鬆啲就收妥新嘅英國車牌啦。不過新聞講最近DVLA嘅員工因為控訴DVLA疫情下保障員工嘅措施不足而罷緊工，可能喺處理申請方面需時耐啲都未定。
另外，DVLA發出英國車牌俾你之後，並唔會將香港車牌退返俾你嘅。如果仲會考慮英國香港兩邊走嘅朋友要留意返，必要時同香港果邊講報失。
編按：唔介意睇英文嘅朋友，我地當然介紹你睇返官網啦！
https://www.gov.uk/exchange-foreign-driving-licence
